11 Taon Naung Salpu

Di Taon 1999 Tgl. 17 – 20 Agustus, di Rapot Guru Huria HKBP maringanan di Suka Makmur disi ma parjolo sahali dipajongjong Tumpak Liat Guru Huria HKBP pasca Rekonsiliasi HKBP. Marsilehon guguna be do uju i laho manumpahi parjongjong ni TLG i, alai ndang haru margogo jala ndang boi pungu jumpa masa angka na patut siguguan.

Sahat tu Taon 2004 Tgl. 04 – 07 Mei, di Rapot Guru Huria na di Sipoholon, ndang boi dope hot jongjong TLG i, jala ndang adong Laporan na torang taringot tu TLG di Rapot i. Songoni muse di Rapot Guru Huria Taon 2009 Tgl. 03 – 06 Pebruari di Suka Makmur, tong dope songon dimulana; ndang tulus dope jongjong TLG i.

Dimulana adong do dua halak sian Guru Huria na dipabangkit laho pauliulihon TLG i. Sahalak ma ma na gabe Ketua na laos huhut gabe Utusan tu Sinode Godang, jala sahalak ma gabe Sekretaris.

Di Rapot Guru Huria na dipatupa di Sukamakmur taon 2009, ndang be dua halak dipabangkit, alai holan sahalak nama na gabe Ketua TLG na laos huhut anggota MPS sian partohonan Guru Huria, na laos gabe utusan tu sinode Godang HKBP.

Na dua gabe sada, na sada nuaeng gabe soada. Na di Tgl. 11 Juli 2010, marujung ngolu do ketua TLG Periode 2008 – 2012 ima Gr. Lesman Sianipar na mangula di HKBP Laguboti. Dang dope marujung periodenasida alai nunga jumolo marujung ngoluna.

Lungun do rohanta diparborhat ni donganta ketua TLG na laos huhut utusan tu Sinode Godang i, mansai lungun muse do panghilalaan ni keluarga na tinadingkonna. Ise ma ulaning na paturehon TLG on? Ai nunga songon anak ni manuk na sioksiok tinadingkon ni inana, mansai menekmenek dope , naung mamungka mardalan alai ndang gopas dope.

Nunga mardalan TLG i 1 ½ taon dung Rapot Guru na parpudi taon 2009. Nunga torop dongan Guru naung Pensiun jala marujung ngolu, alai mangihuthon barita dohot boaboa ni Ketua TLG andorang di ngoluna, adong do 6 halak na so manjalo TLG dope, ima:
1. Gr. Salmon Manurung Tebing Tinggi (Monding)
2. Gr. SP.Marbun Helvetia Medan (Monding)
3. Gr. L.Sianipar Laguboti (Monding)
4. Gr. P.Hutapea P. Siantar (Pensiun)
5. Gr.RW.Simanjuntak Medan (Pensiun)
6. Gr. TMH. Manurung Medan (Pensiun)
__________________
Pel. Ketua Tumpak Liat Guru Huria HKBP
Gr.Abdul Rachman Sitorus
______________________________________