Sejarah Guru Huria

GURU HURIA DI HKBP
Sipatolhason di Pembinaan Guru Huria HKBP
10 – 13 Agustus 2010 di Jetun Silangit


1. Dasar Sejarah.
Mangihuthon sejarah Hakristenon di Tano Batak, mamereng hinaringkot ni panghobasion di huria mamintor hatop do dipingkiri HKBP laho pajongjong parsingkolaan Seminari [Pendidikan Teologia] bahen inganan parsingkolaan ni halak na naeng marhobas di huria. Mardomu tu si dipajongjong ma Lembaga-lembaga Pendidikan di HKBP mamungka taon 1868 ima:
a. Taon 1868: Singkola Guru Huria, na ginoar “Singkola Tinggi” nasida ma naginoar Guru-guru Sending.
b. Taon 1883: Singkola Pandita
c. Taon 1934: Singkola Bibelvrouw
d. Taon 1971: Singkola Diakones

Hombar tu angka na naeng sihobasanna di huria, dipasahat ma tu nasida angka parbinotoan na hombar tu ulaonna dohot kebutuhan ni huria.
[Catatan: Angka Guru do na parjolo mangula di huria Batak asing ni angka missionaris dohot Sintua]

1.1. Singkola Guru Huria.
Dibagsan 7 [pitu] taon dung Konprensi ni angka Missionaris RMG di Tano Batak [1861 – 1868], mamintor dihilala do hinaringkot ni ulaon pamaritahonon ni Barita na Uli. Tarida sian i ia halak Batak nunga lam ungkap rohana manjalo Barita na Uli i, ala ni i nunga lam ringkot angka pangula, hape ditingki i so piga dope angka tenaga missionaris. Marhite panumpahion ni RMG Barmen, mardos ni roha ma angka missionaris RMG laho mendidik angka halak Batak na gabe angka guru muse. Sahalak guru mangula ma ibana mangajarhon angka parbinotoan umum tu angka parsingkola jala laos huhut manguluhon sada huria.

Di Taon 1868 dipajongjong ma singkola Guru Injil na parjolo di Tano Batak, ima na maringanan di Parausorat na ginoar “Seminari Parausorat” angka singkola na tamat sian i di goar ma nasida: Guru Sending.
[Catatan: Uluaon ni angka guru; marbarita na Uli, mangajari dohot manguluhon huria]

1.2. Pangerbangonna.
Di sada tingki ala ni angka situasi dohot haporluan, sipata do dipasohot panjaloan ala dihilala nunga hira lolo. Alai manigor diuduti do muse, ai di Taon 1873 dipajongjong ma muse Singkola Guru, ima na ginoar Singkola mardalandalan. Ala ingkon munsatunsat nasida marsiajar laho mandapothon guruna.

Nunga lam ungkap angka luat na asing tu Barita na Uli i, isara ni Humbang, Pahae dohot na humaliang. Ujungna mamereng tu ringkotna, gabe dipajongjong ma Seminari Pansurnapitu laho inganan Singkola Guru. Dungi di Taon 1901 gabe dipajongjong ma muse Seminari Sipoholon.

Ndang tarambatan parlojong ni Barita na Uli i, ungkap ma muse roha ni angka halak Batak na di Toba dohot na humaliangna manjalo Barita na Uli i, gabe lam hurang ma angka tenaga guru, ujungna dipajongjong ma muse Seminari di Narumonda, jala ndada holan i tahe alai pola do dipajongjong di angka Distrik – distrik Singkola Guru hombar tu ringkotna di huria i.
[Catatan: Ringkotna i hape angka Guru ditingki i]

1.3. Tingkina marsiajar.
Mamungka sian Taon 1868 – 1948, marsingkola/marsiajar ma nasida leleng ni 2 [dua] taon. Mamereng tu ringkotna patamba parbinotoan di nasida, gabe ditambai ma muse tingki dohot materi parsiajaran leleng ni 3 [tolu] taon. Jala lam dihilala ringkotna di huria, di taon 1979 gabe marsiajar ma leleng ni 4 [opat] taon.
Jala nuaeng marsiajar ma nasida leleng ni 3 taon,jala dasor parsingkolaan ima sian SLTA.
[Catatan: atik pe martamba tingki ni parsingkolaan i, alai hot do nasida gabe angka Guru]

1.4. Tujuan Singkola Guru Huria.
a. Pahatophon harararat ni Barita na Uli i di tano Batak.
b. Manghobasi angka huria manguluhon dohot mangajari angka ruas taringot tu hata ni Debata.
c. Tamba ni i, laos martugas do angka guru i di angka parsingkolaan Sending. Jala na deba tahe pola do gabe angka guru kepala di sadasada parsingkolaan Sending. Dung pe mamungka taon 1946, sae ma nasida holan mangajari dohot manguluhon huria. Ianggo na gabe mangajari tu angka parsingkolaan, angka guru na sian pamarenta ma.

2. Dipartingkian nuaeng on.
Mamereng sian sejarah i, tung mansai diharingkothon huria do ditingki i angka guru dohot ulaonna. Alai nuaeng on boasa lam adong panghilalaan dohot pingkiran na mandok: ndang apala ringkot be nuaeng Guru Huria mardomu tu perkembangan ni jaman. Jala di deba huria pola do adong na tangkas manulak molo ditongos Guru Huria tu huria i. Boasa didok ndang pola ringkot be ?? Di hal dia do na so ringkot i? di ulaon do? Ruas ni huria i do mandok na so ringkot ? manang pangula setempat i do na mangambati?

Pendidikan Seminari ( Singkola Guru).
Parsingkolaan Seminari ima Parsamean, inganan parsiajaran ni angka na naeng mangula di huria. Tardok ndang apala sude angka parsingkola i naung marsangajo mamelehon dirina gabe naposo ni Debata mangula di huria. Adong do i na deba na tarjou sian duru, panggilan kerja manang panggilan jabatan. Ai adong do i na deba ala ni sihol ni natoras na mandok ingkon marsingkola Guru do ho anakku. Alai adong do i na tarjou sian bagasan naung tangkas naeng mamelehon dirina gabe parhobas di huria i. Manang dia pe na mangonjar rohanasida dimulana, alai ianggo dung sahat tu Seminari Sipoholon ingkon lehononna ma rohana, tondina dohot ngoluna gabe naposo ni Tuhan i.
Ala ni i angka pangajari di Seminari mansai ringkot do angka naung tangkas mangula di huria, naung hea manguluhon huria, na denggan barita pangulaonna di huria. Unang ma ala na sai marsoali di huria gabe dipapinda mangajari tu Seminari.

3. Istilah Dipendetakan ma sude angka Guru.
Aha do na ringkot di huria manang di ruas ni huria? Goar do manang gelar?? Bajubaju do manang pangulaon? Tardok hita do pintor uli ma HKBP molo dung sude angka Guru gabe Pandita?? Tardok hita do lam tu ulina parsaoran ni angka pangula di HKBP molo pintor sude pangula gabe partohonan pandita? Tardok hita do gabe lam mangorui parbadaan di HKBP molo dung sude partohonan pandita?? So tung do gabe lam manambai boban na dokdok dohot angka parguluton, ala lam torop angka pangula na satirket / na sarupa hak dohot tanggungjawab hape dang dos angka inganan pangulaon. Ujungna gabe masa ma panaritaon. Molo dung sude pangula na gok gabe partohonan pandita, boha lam marsiadu do manghobasi huria i? sotung do gabe marsiadu tu angka inganan hombar tu na hinirim ni rohana be? Molo sude do martohonan Pandita, sama dengan semua pelayan punya hak dan kesempatan untuk menduduki semua jabatan atau kedudukan di seluruh jabatan yang ada di HKBP.
Tasungkun ma jolo dirinta be mandok: Aut tung sura marganti Tohonanku, lam ringgas do ahu mangajari angka dakdanak singkola minggu? Molo marganti Tohonanku, lam ringgas do ahu manghobasi ulaon di huria lobi ruminggas uju Tohonan Haguruon? Molo marganti Tohonanku, lam ringgas do ahu mangajari angka punguan parende?

Molo so piga be angka pangula na olo mangalehon roha dohot tingkina mangajari singkola minggu dohot angka punguan Koor songoni dohot panopoton tu ruas ni huria, antong ise ma na gabe ruas ni huria marsogot? Tading ma singkola minggu, tading ma angka parpungu. Nda denggan do hape molo mamora hita di ragam ragam ni tohohoan dohot panghobasion? [satu dalam kepelbagaian pelayanan]
Antong ndang apala ampit dope sintasintanta na mandok: dipendetakan sude pelayan di HKBP. Alai na dumenggan DIBERDAYAKAN, DIMAMPUKAN ma angka pangula di ulaonna be.
4. Singkola Pandita na Formal.
Unang gabe mangambati di angka sintasinta dohot peningkatan karier nang parbionotoan ni angka dongan, dibungka ma Singkola Pandita, alai unang dipangke istilah Dipendetakan sude. Syarat na gabe calon Singkola Pandita, tangkas ma dipamanat: Motivasina, jala na tumangkas ingkon adong ma kriteria manang Track recordna. Isara ni: Na denggan barita pangulaonna di huria, na ringgas mangula ulaon di huria [kreatif]. Sian dia do i dapot? Tontu adong do data i di Huria, Ressort, Distrik tarlobi Pusat.

5. Pemberdayaan Guru Huria.
Mamereng tu perkembangan ni hamajuon on, tutu nunga ingkon adong angka na ginoaran tenaga ahli, specialis. Keahlian aha do na ringkot peopon ni sahalak guru huria? Angka parbinotoan dia do na ringkot kembanghonon ni sahalak guru huria? Hamu angka dongan guru huria tahamauliatehon ma parsingkolaanta na tolu sahat ro di opat taon i. Boha, tasadari do naung hurang ampit na tapeop i tu partingkian nuaeng on? Di bidang dia do hagaleonta? Atik tung do parbinotoan na tapeop nuaeng on holan parbinotoan na sasantopik manang parbinotoan na mardebadeba? Nda ringkot ma dilengkapi muse, disempuranakan, diisi hombar tu professiena be?
Hira so hea do masa di huria parbolatbolatan, parsalisian binahen ni na ro sian ruas ni huria i sandiri. So hea masa marbolatbolat di huria ala ni na so ringgas ruas marminggu. So hea masa marbolatbolat jala marbadai ruas dohot parhalado ala so beres angka pelean taon dohot tanggungjawabna na asing. Alai pintor mura do marbolatbolat sintua dohot ruas molo masa parsalisian ni sama pangula isara ni: parsalisian ni guru tu pandita, manang bibelvrouw tu pandita dohot sabalikna. Molo i, pintor kesempatan do hita mangelaela ruas asa adong donganta, manang mempengaruhi sintua asa adong mangampini hita. Gabe masa ma dohot na masipalaolaoan. Antong sian ise do haroroan ni parsoalan i? Hape ingkon sursar ma huria? Nda hasadaon, dos ni roha, parsaoran na denggan do na jotjot ndang jumpang di pangula i? Hatutulus ni sada ulaon ima molo denggan kordiasni, komunikasi dohot kerjasama. Alai ndang denggan molo mangasahon huaso pangula sama dongan pangula. Parsingkolaan na ummarga nuaeng on, ima songon dia membangun kerjasama laho mangula ulaon i dibagasan hasadaon dohot panghilalaan ruhut parhahamaranggion, marsihaholongan jala marsipasangapan asa tulus panghobasion; marmulia ma Kristus.

Adong ma nian sadasada ilmu na botulbotul dimiliki sahalak guru [keahlian khusus] laho manguluhon huria i.
Mauliate ma di angka dongan guru na marsingkola laho manambai parbinotoanna. Marasing be do motivasi dohot tujuan nasida. Alai adong do na deba na sai tongtong manghangoluhon jala na so olo mananggali goar dohot ulaon haguruon i sian ibana, atik pe naung tamat sian universitas manang Sarjana Teologia. Nasida ma patujolonta patuduhon hinaringkot ni haguruon i di huria. Patupa hamu ma sian nasa hatauonmuna mangula di huria laho pauliuli huria i.

Boha, songon guru hita dibagasan toruk ni roha taalusi ma jolo dirohanta; sadia godang ma talehon rohanta, pingkiranta, gogonta dohot tingkinta mangula ulaon i songon patutna sahalak guru? Jolo singkop ma taula ulaon haguruona ia naeng eahanta Tohonan na sadanari. Alai na dumenggan, hot ma hita so mubauba, naung tajalo i taulahon ma. Naung taparhatoho i, hot ma i toho. Naung Tohonanta hian, hot ma i Tohonanta. Naung Tardidi i tubagasan Kristus Jesus, ndang pola be ingkon didion tu goar na asing. Boha ia Tohonan na boi do margantiganti?? Ai nunga naung di parhatoho na parjolo, dungi diparsoada muse. Ai so boi rap diulahon duansa. Tontu ditanggal do na sada. Gariada tahe olo do gabe dimusui na parjolo i. Atik tung do muruk Tuhan i molo ingkon marganti tohonanta?? Jabatan do na boi meningkat manang marganti, alai ianggo tohonan ndang jadi songoni. Antong asa tung singkop pangulaon ni angka guru, asa tau nasida songon sahalak guru, dipatolhas ma tu nasida angka parsiajaran na patut tu ulaon ni guru di huria/ diberdayakan kembali. Sagari tung sude pe taula angka i, nda ingkon dohononta do: naposo na so hasea do ahu, ai intap ulaon na patut do huula hami. Songon pandok ni Paulus ma tu si Timoteus: Silompit do jujuron hasangapon ni sintua [guru], na burju mangula hasintuaon [haguruon], gumodang ma tu angka na mangulahon hata dohot poda. 1 Tim 5: 17.

Medan, 20 Juli 2010

Gr.Abdul Rachman Sitorus http://www.suksesdbsmedan.blogspot.com