Eksistensi Guru Huria di HKBP

Nunga marpadan hita di jolo ni Debata uju na manjalo Tohonan Haguruon i hita be. Alai disada tingki tatanggali do muse padanta i, jala tasolukhon padan na asing. Boha ia hita na marpungu nuaeng on, jala angka donganta guru na hot dope mangula di huria di tingki on, hot dope hita di padanta? Laho pahothon parjongjong ni TLG on, ingkon hot do hita di padanta. Jala ia tapabangkit pe manang ise na gabe ketua manang na mangurus TLG on, ingkon jolo marpadan ma ibana na so tadingkononna Tohonan Haguruon. Alai ndang tiala roha, ise halak na so olo bongot ia dung diungkap pintu na pinaimana i?. Adong do 3 pintu na balga na gabe dalan haruar sian haguruon na laos gabe hamomoru ni angka Guru Huria di HKBP, ima; na parjolo, Laho marsingkola Pandita tu Sipoholon. Na paduahon, Laho marsingkola Pandita tu STT HKBP. jala na patoluhon, hombar tu ringkotna na boi do dipatupa Program M.Div. Ala ni na 3 pintu dalan hamomoru ni angka Guru i, tamba muse na moru binahen ni angka na pensiun dohot na monding, tontu ianggo bilangan ni angka guru huria ndang lam martamba be, alai lam tu moruna nama ganup taon. Ala ni i, dung pinamanat jala pinahusorhusor saluhutna i, huhut manatap partohonan na duanari; Bibelvrouw dohot Diakones gabe tubu ma tu bagasan roha songon na sinurathon di poin na mangaihut on

TUMPAK LIAT PANGULA NA GOK TINGKI (TLPG)
Adong do 4 kategri Partohonan na gok tingki di HKBP, ima Pandita, Guru Huria, Bibelvrouw dohot Diakones. Sada sian i naung patupa Tumpak liat jala naung togu hajongjonganna, ima Tumpak Liat Pandita. Bibelvrouw pe tong do adong Tumpak Liat nasida na digoari Tumpak Liat Bibelvrouw (TLB). Masuk tu TLB do sude Bibelvrouw songoni nang naung marhamulian pe. Jala angka na so marhamulian, dihunjuk ma sahalak na gabe ahli waris sian tongatonga ni keluarganasida na gabe hasahatan ni TLB i ia marujung muse ngoluna. Diakones hira dos do parsorion ni Tumpak Liat ni on tu Guru Huria. Alai nuaeng nunga adong be dipajongjong nasida, jala panggararan nasida pe sahat do Rp.100.000,- ganup molo adong na masa.(Pensiun manang monding anggota).
Atik pe marragam Tohonan dohot ulaon i, alai sada do silehon Tohonan i ima Jesus Kristus ulu ni huria i. Sada do na pabangkithon angka partohonan i. Laos Ibana do mangalehon deba gabe apostel, deba panurirang, deba evangelist, deba muse parmahan jala pangajari, patureturehon angka na badia i, laho mangulahon tohonan i, pauliulihon daging ni Kristus (Eps. 4: 11 – 12)
Apostel Paulus mandok, atik pe marasingasing jala torop ruas ni pamatang i, alai sada do na maniop saluhutna jala martomu pinadomu ni uraturat di pamatang i. ala ni i, ia mangae sada ruas ni pamatang i, rap mangae do saluhut ruas i.
Naeng ma nian songoni panghilalaan ni sude angka pangula i, rap marlas ni roha dohot na marlas ni roha, jala rap marsurupan di na dokdok i.

Mamereng hamaolon ni parjongjong ni TLG, nunga ingkon pingkiran sada dalan na dumenggan laho pauliulihon asa rap taruli jala rap marsiurupan nian saluhut angka partohonan (Pangula na gok tingki). Sada hamaolon ima ala angka partohonan guru huria na boi dope manorushon parsingkolaanna gabe martohonan Pandita manadingkon haguruonna. Jala ditingki na parpudi on lam doras do hamomoru ni angka Guru huria, ima angka na laho marsingkola. Na deba tu Sipoholon (Singkola Pandita) na deba Program Master of Divinitif jala na deba STT di Pematang Siantar.
Sai hira paradianan satongkin nama Guru Huria, isara ni terminal Bus. Godang do Bus di terminal i, alai tongkinnai ndang disi be. Lao be do Bus i dung gok panumpangna, jala na deba dituntun do lomona borhat nang so gok dope panumpangna ala ni panosak ni tingki pardalananna. Sai hira songoni do binereng angka guru nuaeng on. Mangula satongkin di huria painte borhat muse. Mangula satongkin di huria paima gok umur manang paima adong gogo, dungi laho muse mangeahi Tohonan Hapanditaon.
Ala ni i ma, marhite pertemuan ni Guru Huria on pinatolhas pingkiran on, laho mangeahi hasadaon manalpuhon hamaolon; ia dipasada ma Tumpak liat ni sude Pangula na Gok Tingki di HKBP ? Marhite i ndang adong be na haru so haru, alang so alang mandohoti Tumpak Liat. Adong manang piga pingkiran umbahen niusulhon pangidoan on;
• Ala rap partohonan jala pangula na gok tingki do na 4 tohonan i di HKBP
• Sada do na marsuru jala paborhat hita tu ulaon di huria i, ima Kristus Jesus ulu ni huria i.
• Marragam do nian parsagi ni ulaon dohot jabatan ni na 4 partohonan i, alai ianggo tu sitaonon i tarlumobi hamatean i ndang adong parasinganna.
• Ala ulaon Sosial do Tumpak Liat i, na boi do hita marhasadaon disi asa jumpang songon na nidok ni surat i; Ia mangae sada ruas ni pamatang i, rap mangae do saluhut ruas i.
• Okuhononta do ia partohonan na tumorop nuaeng di HKBP ima partohonan Pandita nama, dungi Guru Huria, dungi Bibelvrouw jala na ummotik ima Diakones.
• Ala siotikotik nama partohonan na 3 i, gabe ingkon balga ma nang panggararan. Alai molo marhasadaon do Tumpak Liat i, boi ma numeang tuhuhon.
• Patut do hita na margogo i mangurupi angka na hurang gogo laho padengganhon jala pauliulihon.

Ia goar ni Tumpak Liat i tar hira songonon ma: Tumpak Liat Pangula na Gok Tingki. Disingkat TLPG. Ianggo parsagina dohot parturena dipasahat ma i tu ahlina laho patomutomuhon. Adong ma sahalak sian ganup partohonan i na patureturehon Tumpak Liat i, niurupan ni angka kordinator manang kolektor di ganup Distrik. Marhite on hupangido hami ma dohot hormat jala dibagasan serep ni roha huhut manghirim tu hamu amanami, inanami Pandita HKBP: Padohot hamu ma hami marhasadaon di Tumpak Liat i. Laos pinasahat ma pangidoan on tu Ketua Rapot Pandita HKBP (KRP HKBP) tarlumobi tu Pucuk Pimpinan HKBP, Ompu i Ephorus HKBP. Sai ditumpak Tuhan i ma huriana, dipargogoi naposona laho patureture huria i.


Medan, 25 Agustus 2010

Gr.Abdul Rachman Sitorus
Pel. Ketua TLG HKBP
HKBP Pardomuan Ress. Medan Selatan
0812 6531 9079