Hot ma hita Sauduran !

Mandapothon:
Hahaanggi Guru Huria HKBP
Di Sipoholon, Pematang Siantar.
(Sikola Pandita, STT dohot MDiv)
________________________________

Tabe Parhahamaranggion.
Sada huta na so tarhalupahon ima huta Seminary Sipoholon.
Sai huingot do hinaulimi, lambokna i pangullus ni alogo i mangombus bulung ni sampinur dohot tusam i, gabe tarbege ma soara na marsesek....

Hundul au ditoru ni tusam i, hujaha buku parsiajaran i. Loja simalolongki hupapeak satongkin...

Dungi tarbege ma soara ni lonceng manjou laho marsipanganon bodari. Ulinai tahe jala sonangna i rap dohot angka hahaanggi na marsingkola Guru uju i.

Oh... Seminarium Sipoholon....Nunga tung godang ditubuhon ho na gabe angka naposo ni Tuhan i parhobas di huria i. Dimulana sorang di haguruon, dungi lam magodang, marsingkola muse gabe lam tu timbona parbinotoan dohot ulaon na niula ni angka natinubuhon di Sipoholon i.

Dimulana Guru huria, dung mangula manang piga taon lelengna, gabe tarjou ma muse marsingkola pandita. Dungi gabe Pandita, na deba nunga gabe pangajari di Seminary dohot di Universitas. Pinuji ma Tuhan i na mangalehon partingkian tu hita saluhutna laho mangula di harajaon ni Tuhan i.

Atik pe naung marbagi di ulaon i, marserak di angka luat, sian utara sahat ro di Eropa sada do na ni ulana dohot tinujuna,ima laho mamboan Barita na Uli i sahat tu ujung ni portibi on. Tongtong do hita sauduran jala sanghambona dibagasan Goar na sasada i Ima Jesus Ulu ni Huria i.

Tapajongjong do hasadaon ni angka Guru Huria na tammat sian Sipoholon ima naginoaran Tumpak Liat Guru Huria HKBP ( TLG HKBP). Na boi do manang ise masuk tu hasadaon ni Guru Huria i angka na martohonan Guru Huria, dohot angka Pandita na martohonan Guru Huria hian.

Sian sada haroroan do hita dimulana i, sada do ina di hita, ala ni i HOT MA HITA SAUDURAN. Rap marsiurupan, rap mamorsan angka na dokdok i. Tajaha ma angka barita taringot tu TLG HKBP di Web on. Tarlumobi angka hahaanggi na tongon marsingkola Pandita nuaeng di Sipoholon dohot Pematang Siantar, hirim do rohanami tongtong hita rap sauduran.

Ndang taboto na naeng masa marsogot haduan, tagamonta do las ni roha dohot hangaluton di ngolu on. Ringkot situtu do pahot pardonganon, ai molo sahalak mura tinggang jala punjung. Na boi do angka Guru Huria na marsingkola di Sipoholon dohot Pematang Siantar masuk tu TLG HKBP.

Ala ni i manang ise hita na rade mendaftar di TLG HKBP, boi ma dihubungi pengurus TLG HKBP ima, Pel. Ketua: 081265319079, Gr. Abdul Rachman Sitorus: alamat Email: gus_durs@yahoo.com

Sekretaris/Bendahara: 081370127615, Gr. Marjejer Aritonang.
Rekening: BRI M.YAMIN No. 531801000564509 a/n GR.MARJEJER ARITONANG TLG.

Ganup Transfer tasurathon ma Goarta goar Lengkap asa boi tarida di rekening koran.

Songoni ma hupasahat hami tu hamu saluhutna hahanggi Guru Huria HKBP.

Tabe Parhahamaranggion
Sian hami;
Gr. Abdul Rachman Sitorus - Pel. Ketua.
__________________________________