Surat Edaran Ephorus HKBP

No. 163/030/III/2005 Pearaja, 15 Maret 2005
Hal: Surat Edaran.


Mandapothon:
Sude Huria di HKBP
Di Ingananna be.


Tabe dibagasan Tuhanta Jesus Kristus
Mardomu ala naung ditotophon hurianta Aturan Paraturan HKBP 2002 dohot Petunjuk Pelaksanaan (Juklak), marhite Sinode Godang dohot Parhalado Pusat, na ditotophon SK ni Ephorus HKBP tanggal 21 Januari 2004, Nomor: 48/L-08/I/2004, ingkon marhite amandemen nama molo adong sipauneon, jala nunga adong partording ni amandemen di Juklak i. Alai ala adong na ringkot sipadasipon, lumobi di Juklak, asa tumangkas boi pangkeonta patiurhon angka panghobasion, gabe pinatupa ma songon angka na di toru on;

1. Taringot tu ulaon ni Guru Huria di Huria Sabungan
Tangkas do didok di Juklak i, ima "Hombar tu tohonanna songon na tarsurat di Agenda HKBP dohot tu pangaturhonon ni Pandita Ressort".
Torop na mangantusi ulaon ni Guru Huria di Huria Sabungan holan "hombar tu pangaturhonon ni Pandita Ressort" hape holan na manambai do i. Anggo ulaon ni Guru Huria na rumingkot ima: Hombar tu tohonannasida songon na tarsurat di Agenda HKBP" Ala ni i, nasida do mandongani Pandita mangaradoti:

a. Administrasi di huria i.
Molo adong sekretaris huria di huria sabungan, Guru Huria na di Huria sabungan i do mandongani Pandita Ressort maniroi nasida. Guru Huria do nang na mangaradoti angka Tingting, mandongani Pandita Ressort.

b. Parhepengon di Huria Sabungan
Guru Huria na di Huria Sbungan i do mandongani Pandita Ressort maniroi Parhalado Parartaon dohot Bendahara. Asa siradotan ni Guru Huria sabungan do nang Parhepengon mandongani Pandita Ressort. Ala ni i, ingkon jolo diparaf Guru Huria na di Huria Sabungan i do sude Surat Hatorangan dohot akta asa ditandatangani Pandita Ressort.

2. Taringot tu Sinode Distrik.
Tutu di Aturan Paraturan HKBP 2002 dibahen do Sinode Distrik sahali dibagasan dua taon. Alai ala adong ulaon konstitusional ni Sinode Distrik na ingkon ulaonna, ima manotophon Program dohot Anggaran tahunan, denggan ma dipatupa Sinode Distrik sahali sataon, alai mardalan ma hombar tu Aturan Paraturan HKBP 2002 dohot Juklakna.

3. Taringot tu angka Punguan Kategorial di Distrik.
Sada unok ni Aturan Paraturan HKBP 2002, ima pamargogoion ni Distrik (pemberdayaan Distrik) laho mangulahon impola ni ulaonna; "perencanaan dohot operasional". Ingkon jumpang do i nang di panghobasion tu kategorial. Ala ni i ingkon adonghonon do horong kategorial di tirket Distrik, na digoari punguan (Persekutuan), ima; Punguan Sikola Minggu Distrik, Punguan Remaja Distrik, Punguan Naposobulung Distrik, Punguan Parompuan Distrik, Punguan Ama Distrik. di na patupa i, ingoton ma;

a. Ruas ni angka punguan i, ima angka seksi kategorial na di Huria.
b. Ganup Punguan Kategorial Distrik diuluhon Praeses marhite kordinasi ni Kepala Bidang Koinonia niurupan ni MPSD.
c. Punguan Kategorial Distrik marruashon seksi kategorial huria marhite Pandita Ressort dibagasan kordinasi ni Uluan ni Huria
d. Pangurus ni Punguan Kategorial Distrik ndang boi marumur lobi sian 61 taon.
e. Punguan Kategorial distrik patupahon panghobasion:

e.1. Patubu dohot pahembangkon hasadaon di parsaoran di sude ruas ni kategorial huria na di Distrik i.
e.2. Sumangkapi angka program panghobasion na renta dohot na marsanggasangga (periodik) huhut mangulahonsa
e.3. Patupa kebaktian ni kategorial di Tingkat Distrik di HKBP
e.4. Mangkordinasi dohot patupa angka kebaktian oikumenis di Distrik i.

f. Ganup ulaon i ingkon jolo ditolopi Praeses dibagasan kordinasi ni Kepala Bidang Koinonia.

Songoni ma pinasahat tu saluhut Huria di ingananna be. Jesus Kristus Raja ni Huria i ma na sai tongtong mandongani hita saluhutna.

Mardongan tabe dohot tangiang
HURIA KRISTEN BATAK PROTESTAN
Ephorus HKBP.
tertandatangan dan Stempel)
_____________________________

Surat Edaran on nisalin sian Surat Edaran Ephorus HKBP.
_______________________________________________________
Pel. Ketua TLG HKBP, Gr. Abdul Rachman Sitorus.